L-Ambaxxatur Joseph Cole għadu kif ġie maħtur bħala Ambaxxatur ġdid ta’ Malta għall-Istati Uniti. L-Ambaxxatur Cole, li ilu żmien twil jaħdem fil-Ministeru ta’ l-Affarijiet Barranin, dan l-aħħar kien qed jokkupa l-kariga ta’ Direttur-Ġenerali għall-Affarijiet Ewropej u Ekonomiċi. Tul il-karriera tiegħu huwa serva wkoll bħala Direttur għall- Affarijiet li jikkonċernaw id-diplomazija multilaterali. Kien ukoll Konslu Ġenerali ġewwa Sydney, l-Awstralja, bejn l-1983 u l-1985, kif ukoll Deputat Kap tal-Kummisjoni Għolja Maltija f’Londra bejn l-1998 u l-2001.
L-Ambaxxatur Cole kellu wkoll l-irwol ta’ Chairman tas-Sanctions Monitoring Board li kellu funzjoni kruċjali matul il-kriżi fil-Libja, kif ukoll l-implementazzjoni tas-sanzjonijiet fuq l-Iran fost pajjiżi oħra.
L-Ambaxxatur Cole mistenni jieħu l-ħatra tiegħu bħala Ambaxxatur ta’ Malta għall-Istati Uniti fil-ġimghat li ġejjin.
|