Matul dawn l-aħħar ġimgħat, mijiet ta’ nies aċċessaw is-servizz tat-trattati ‘on-line’ offrut mill-Ministeru tal-Affarijiet Barranin fuq il-websajt www.foreign.gov.mt. Is-servizz qed jikber fil-popolarità tiegħu tant li r-rikjesti biex jitniżżlu t-trattati qed tiżdied kuljum b’mod sostanzjali.
Dan is-servizz beda jiġi offrut fil-bidu ta’ dan is-sajf u t-trattati kollha sa mill-Indipendenza l-hawn jinsabu online fuq is-sit tal-Ministeru tal-Affarijiet Barranin: www.foreign.gov.mt .
Dan il-proġett sar fuq inizjattiva tal-Viċi Prim Ministru u Ministru tal-Affarijiet Barranin Dr Tonio Borg. L-uffiċjali tal-Ministeru tal-Affarijiet Barranin ħadmu u wettqu dan il-proġett. Il-pubbliku issa għandu l-faċilità li jaċċedi kull trattat mill-kumdita tad-dar jew l-post tax-xogħol jew tagħlim tiegħu fi kwalunkwè ħin.
Dawn it-trattati jistgħu jitniżżlu mis-sezzjoni ‘Treaty Series’ li l-link għaliha tinsab fil-paġna www.foreign.gov.mt. It-tfittxija inħadmet b’tali mod li l-utent jista’ jfittex skont il-pajjiż, l-isem tat-trattat partikolari, id-data tar-ratifika, id-data tal-iffirmar, kif ukoll permezz ta’ keywords differenti.
Dan is-servizz huwa l-ewwel wieħed tax-xorta tiegħu f’pajjżna. Din hija ħolqa oħra mill-katina ta’ inizjattivi li ħa dan il-Ministeru f’din il-leġiżlatura sabiex ikun aktar viċin in-nies.
|